Ака уйăхĕн 25-мĕшĕнче, Аслă вĕрентекенĕмĕр Иван Яковлевич Яковлев çуралнă кун, Чăваш чĕлхи кунне уявлатпăр. Çак кун чăвашсем пурăнакан пĕтĕм хулапа ялта «Пĕтĕм чăваш диктанчĕ»  акци иртрĕ. Ăна Чăваш чĕлхи кунне тата Чăваш Республикинчи Мухтавлă ентешсен çулталăкне халалланă.

    Акцин тĕп тĕллевĕ – чăваш чĕлхин пĕлтерĕшне, сумĕпе хисепне ÿстересси.

 Диктант тексчĕ чăваш чĕлхине тĕнче уçлăхне çити çĕклесе чăваш халăхĕ пирки пĕтĕм тĕнчене пĕлтернĕ Улăпăмăр, икĕ хут Совет Союзĕн Геройĕ ятне тивĕçнĕ Шуршăл ачи – Андриян космонавт çинчен пулчĕ. Текста вулаканĕ – Евгений Урдюков артист, «Чĕнтĕрлĕ чаршав - 2022» конкурсăн «Чи лайăх арçын ролĕ» номинаци çĕнтерÿçи.

    «Пĕтĕм чǎваш диктанчĕ - 2022» акцие Мăн Ямашри вăтам шкулта вĕренекенсемпе вĕрентекенсем те хутшǎнчĕҫ. Пурĕ 8 ҫын Константин Петров çыравçă, журналист, ăсчах, педагог хайлавĕ тǎрǎх «Уçлăхра – икĕ космонавт» ятлă диктант  ҫырма кǎмǎл турĕ.