Миронова Ангелина - «Çеçпĕл – пирĕн чĕрере» онлайн-викторина çĕнтерÿçи.           

Çеçпĕлĕн пултарулǎхĕ тǎван çĕр çинче чечекленсе ешерет те çÿл тÿпе таранах çĕкленет. Вǎл ĕнтĕ çав çĕрĕн, хǎй çуралнǎ тǎрǎхǎн тÿпи çеç мар, мĕнпур планетǎн сенкер тÿпин пĕр пайĕ пулса тǎрать. Поэт кун-çулĕ урǎхларах йĕркеленнĕ пулсан та эпир революци кǎварĕпе хĕмленекен сǎвǎсене вулатпǎр, вĕренетпĕр. Мĕншĕн тесен вĕсен туртǎмĕ, хǎвачĕ, илĕртĕвĕ чǎвашсемшĕн кǎна мар, ытти халǎхсемшĕн те ǎнланмалла, çывǎх. Вǎл чуна ǎшǎтать, çунатлантарать, малалла ǎнтǎлма хистет.

         Çавна май шкул ачисем Çепĕл Мишшин пултарулăхĕпе ĕçĕ-хĕлĕ çинчен ытларах пĕлччĕр тесе тата вĕсене тĕрлĕ мероприятисене ытларах явăçтарас тесе районти тĕп библиотека 2019-мĕш çулхи юпа уйăхĕн 15-мĕшĕнчен пуçласа чук уйăхĕн 10-мĕшĕччен «Çеçпĕл – пирĕн чĕрере» ятпа онлайн-викторина туса ирттерчĕ. Викторинăна пурĕ 26 шкул ачи хутшăннă. Вĕсенчен чи пултаруллă 5 ачана суйласа илнĕ. Пултаруллисем шутĕнче Мăн Ямашри вăтам шкулта 6-мĕш класра вĕренекен Миронова Ангелина та пур. Вăл çĕнтерÿçĕ пулса тăнă.

Викторинăра çĕнтернĕ ятпа Ангелинăна саламлатпăр, малалла та хастар та маттур пулма ырлăх-сывлăх, ăнăçу сунатпăр.