Кăçал, чÿк уйăхĕн 16-мĕшĕнче, чăваш поэзийĕн паллă классикĕ Çеçпĕл Мишши çуралнăранпа 120 çул çитет. Çак паллă куна халалласа чӳк уйӑхӗн 13-мĕшĕнче  Элĕк  шкулĕнче Çеçпĕл сăввисене илемлӗ вулакансен конкурсӗ иртрӗ.

Унта Элĕк районӗн шкулӗсенчи 7–11 классенче вӗренекенсем хутшӑнчӗҫ. Вунă шкултан пуҫтарӑннӑ 20 вӗренекен хӑйсен сӑвӑ вулас ӑсталӑхӗпе паллаштарчӗ. Юратнӑ поэтӑмӑра чысласа ирттерекен уява районти чăваш чĕлхипе литературине вĕрентекенсен методика пĕрлешĕвĕн ертÿçи Иванова Г.И. уҫрӗ. Вӑл ачасене уяв ячӗпе саламларӗ, конкурсӑн тӗллевӗпе, кун йӗркипе паллаштарчӗ, хыҫҫӑн сӑвӑ вулакансен конкурсӗ пуҫланчӗ.

 Жюри членĕсем ачасен пултарулӑхне 3 ӳсӗмпе хакларӗç: пӗрремӗш ӳсӗмрисем – 5-6 классем, иккĕмĕш ÿсĕмрисем - 7–8 классем, виççӗмӗш ӳсӗмрисем — 9–11 классем. Уҫҫӑн та кӑмӑллӑн янӑрарӗҫ кӑвар чӗреллӗ поэтӑн ҫулӑмлӑ сӑввисем. Пӗринчен тепри илемлӗрех вулаҫҫӗ ачасем. Пӗрре ҫӳҫенсе илетӗн, тепре хумханса каятӑн… Ҫеҫпӗл сӑввисене урӑхла итлеме май та ҫук. Ун сӑввисенче — чӑваш халӑхӗн ӗлӗкхи пурнӑҫӗ, шухӑш-кӑмӑлӗ, терчӗ-асапӗ, малашлӑха туртӑнни, ҫутӑ пуласлӑха шанни. Ҫеҫпӗл Мишшин шухӑш-ӗмӗтне, чун-чӗри ыратӑвне, хӗпӗртӳ-савӑнӑҫне унӑн сӑввисем урлӑ итлекенсем патне ҫитерме тӑрӑшрӗҫ ачасем.

Мǎн Ямаш шкулĕнчен конкурса килнĕ 6-мĕш класра вĕренекен Миронова Ангелина «Чǎваш арǎмне» сăввине вуласа пурин чун-чĕрине те тыткăнлама та хускатма пултарчĕ. Çакна жюри членĕсем те ĕнентерсе пачĕç, Ангелина призёрсен шутне кĕме пултарчĕ.

Сăвă çыракансем те хǎйсен сǎввисемпе савăнтарма пултарчĕç. 8-мĕш класра вĕренекен Трафимов Андрей Çеçпĕле халалласа çырнǎ «Ялан асǎмра» сǎввине илемлĕ вуласа пачĕ. Александрова Алёна 5-мĕш класра çеç вĕренет пулин те хǎйĕн «Манар мар Çеçпĕле» ятлǎ сǎввипе район шайне тухма пултарчĕ.

Пултаруллă вĕренекенсене чунтанах саламлатпăр! Çеçпĕл Мишши: «Хастарлă, хыт утăмлă пулăр, çĕр-шывăн хастар ачисем, вут кайăклăн вĕçĕр, ан юлăр, ан юлăр кун-çул уттинчен!» - тесе çамрăксене чĕнсе каланине, чăнах та, пурнăçлама хатĕр пулнине ĕнентерсе пачĕç пирĕн районти шкулсенче вĕренекенсем. Малашне те çакăн пек пултаруллă та хастар пулма сунатпăр  вĕсене!